India Target on Cyber Criminals

સાયબર ક્રિમીનલ્સ... ટાર્ગેટ INDIA

સાયબર ક્રાઈમની યાદીમાં ભારત હોટલીસ્ટ પર છે. સાયબર ક્રાઈમનો સામનો કરવો ભારતની કંપનીઓ માટે મુશ્કેલ બની રહ્યો છે. ઓનલાઈન નિષ્ણાતો માને છે કે સાયબર ક્રાઈમના કારણે કરોડોનો ફટકો વાગી રહ્યો છે. એક અહેવાલ અનુસાર સાયબર ક્રાઈમથી અસરગ્રસ્ત ટોપ-ફાઈવ દેશોમાં ભારતનો સમાવેશ થાય છે. ઓગસ્ટ ૨૦૧૩માં ભારતની ૪૧૯૧ વેબસાઈટ હેક થઈ હતી. જ્યારે જુલાઈમાં ૨૩૮૦, જુનમાં ૧૮૦૮ હેક થઈ હતી. જુન-જુલાઈની સરખામણીમાં ઓગસ્ટમાં લગભગ બમણી વેબસાઈટ હેક થઈ હતી.
વિશ્વમાં હેકીંગ બિઝનેસમાં વધારો થયો છે એમ ઈન્ટરનેટ સિક્યોરીટીના બિઝનેસમાં પણ વધારો થયો છે. ડીજીટલ જોખમો અને સાયબરવિકટીમ વગેરે ઈન્ટરનેટ સિક્યોરીટી ક્ષેત્રે મહત્વના બનતા જાય છે. વેબસાઈટ હેકીંગના કારણે સીધી ખોટ જવાના બદલે આડકતરી ખોટ લગભગ ચાર ગણી હોય છે.
સાયબર સિક્યોરીટી માટે ઘણી કંપનીઓએ ટીમ ગોઠવી છે પરંતુ સાયબર ક્રાઈમ આચરનારી ફોજમાંથી કોઈ બચી શકતું નથી.
કેટલીક કંપનીઓએ તો સાયબર ક્રિમીનલ્સનો સામનો કરવા ચીફ રીસ્ક ઓફિસર જેવા હોદ્દા આપીને સાયબર નિષ્ણાતોને આકર્ષ્યા છે. કેટલીક કંપનીઓ ફોરેન્સીક કન્સલટન્ટ પણ રાખે છે. સાયબર ક્રિમીનલ્સ ક્યારે કઈ દિશામાંથી ત્રાટકશે તેની ખબર નથી હોતી. સોશ્યલ નેટવર્ક તેમનું નવું પ્લેટફોર્મ બની ગયું છે.
સોશ્યલ નેટવર્કીંગ પર ઈન્ટરનેટના નવા વપરાશકારો વધુ હોય છે અને આ લોકો સાયબર ક્રાઈમ તેમજ હેકીંગ બાબતે બહુ જાગૃત નથી હોતા.
૨૦૧૪ના વર્ષમાં સાયબર ક્રાઈમ કરનારા વધુ ઝનૂન પૂર્વક ત્રાટકશે. માલવેર મોકલવાનું પ્રમાણ કદાચ ઓછું થશે પણ ડેટા સામે હુમલા તેજ થશે. નેટવર્ક કરતા કલાઉડ ડેટાને તે લોકો ટાર્ગેટ કરશે. સાયબર હુમલા કરનારા ઈન્ટરનેટ પરથી વેબસાઈટોને ટાર્ગેટ બનાવવાના નવા આઈડિયા અમલી બનાવશે.
સાયબર ક્રાઈમ સાથે સંકળાયેલાઓ તબક્કા પ્રમાણે હેકીંગ કરે છે. તેમાં મોટાપાયે મેલ મોકલનાર, ઓનલાઈન લોકોને ફસાવનાર, પૈસા માગનારા અને પૈસા લેનારા અલગ રીતે કામ કરે છે.
ભારતની કમનસીબી એ છે તે ઈન્ટરનેટ ક્ષેત્રે ઘણું આગળ વધી ગયું છે પરંતુ સાયબર ક્રાઈમ પરત્વે શરૃઆતથી જ બેધ્યાન રહ્યુ હતું. હજુ પણ ભારત કડક સાયબર-લો બનાવી શક્યું નથી. ઈન્ફોર્મેશન ટેકનોલોજી ક્ષેત્રે કેટલાક નવા કાયદા ઘડાયા છે પણ તેનું અમલીકરણ થઈ શકતું નથી.
ઈન્ટરનેટની ભારતમાં શરૃઆત સાથે જ કાયદા ઘડવાની જરૃર હતી પરંતુ ભારત સરકાર ઈન્ટરનેટ પરની આઝાદીને અને સ્વતંત્રતાને વળગી રહેવાની લ્હાયમાં તેના દૂષણોને ઓળખી શકી નહોતી. આજે સ્થિતિ એ છે કે ખુદ સરકાર જ કેટલીક વિગતો પર પ્રતિબંધ મૂકવા માગે છે અને વાંધાજનક મેટર પણ દૂર કરવા.
ઈન્ટરનેટ પરની સ્વતંત્રતા પર સરકાર વારંવાર તરાપ મારે છે.
સાયબર ક્રિમીનલ્સનો સામનો કરવામાં ભારત શરૃઆતથી જ પાછળ રહ્યું છે. પાકિસ્તાનના હેકર્સ જ્યારે વેબસાઈટ હેક કરતા હતા ત્યારે ભારત નવા આઈટી કાયદાની રાહ જોઈને બેસી રહ્યું હતું. સાયબર ક્રાઈમના કારણે ભારતના ઈન્ટરનેટ ક્ષેત્રે ઘણું નુકસાન થયું છે.
ભારતમાં ડાયલ અપ કનેક્શનથી શરૃ થઈને હવે ફોર-જી સુધીની સ્પીડ વધી રહી છે. ફોર-જી ભલે હજુ શરૃ ના થઈ હોય પણ કેટલાક શહેરોમાં તેનું ટેસ્ટીંગ થઈ ગયું છે એટલે ૨૦૧૪ના શરૃઆતમાં છ મહિનામાં તેનું અમલીકરણ જોવા મળશે. ઈન્ટરનેટની સ્પીડમાં આવેલી ક્રાંતિના કારણે મોબાઈલ પર ઈન્ટરનેટનો વપરાશ વધ્યો છે.
એક તરફ વધતી સ્પીડના પગલે ઈન્ટરનેટ સર્ફીંગ રસપ્રદ બનવા લાગ્યું અને મોબાઈલ ગેેજેટસના કારણે વપરાશકારો વધ્યા પણ સાયબર સિક્યોરીટી બાબતે સત્તાવાળાઓ ખાસ કોઈ પગલાંના લઈ શક્યા કે કોઈ સુધારો પણ ના કરી શક્યા.
સાયબર ક્રાઈમના ક્વાટામાં ભારતની વેબસાઈટો અને ઈન્ટરનેટના સામાન્ય વપરાશકારો એટલા માટે આવી ગયા છે કે તે લોકો સિક્યોરીટી બાબતે જાગૃત નથી. પાસવર્ડ બદલવો, પાસવર્ડ કોઈને ના આપવો, આજાણ્યા ઈ-મેલ ડીલીટ કરવા, લોટરીના કે મિલ્કતના પ્રલોભનો મેલથી દૂર રહેવું વગેરેથી જાગૃતિ કેળવાતી નથી.
૨૦૧૪માં સાયબર હુમલા વધશે, સાયબર ક્રાઈમ વધશે. આઓ ઈન્ટરનેટ પર આપણે સાયબર ક્રાઈમ સામે જાગૃત થઈએ.